СҚО-да Қазақстанда тыйым салынған діни ұйымның өкілдері-сектанттар ұсталды
| Солтүстік Қазақстан облысында полицейлер алматылық әріптестерінің көмегімен сектанттарды ұстады. |
Деструктивті діни ағымның өкілдері – шетелдіктерді ел аумағынан шығару туралы сот шешімін орындамаған, деп хабарлайды Caravan.kz медиа-порталы ҚазАқпаратқа сілтеме жасап.
СҚО полиция департаменті баспасөз қызметінің мәліметінше, Қазақстанда тыйым салынған діни-тоталитарлық сектаны ұстанушы екеу — Ресей азаматы. Полицейлер оларды ұстау бойынша жедел-іздестіру іс-шараларын Алматы қаласының аумағында жүргізді. 42 жастағы ер адам мен 60 жастағы әйел осыған дейін де жедел уәкілдердің назарына іліккен. 2022 жылдан бастап олар Петропавл қаласына бірнеше рет келіп, жұртты секталарына шақырған, «рухани тазаруды» уәде еткен.
Нәтижесінде осы жылдың басында екеуіне қатысты ҚР Әкімшілік құқық бұзушылық туралы кодексінің 489-бабының 10-бөлігі бойынша хаттамалар толтырылды. Сот құқық бұзушыларға 50 АЕК мөлшерінде айыппұл салып, ел аумағынан шығуға міндеттеді.
Алайда сектанттар Ресейге емес, Петропавлдан Алматыға кетіп қалған. Уақыт өте келе оларды полицейлер тағы та ұстады. Бірер күн бұрын Петропавл қаласының мамандандырылған әкімшілік соты оларды ҚР ӘҚБтК-нің 490-бабының 3-бөлігі бойынша әкімшілік жауапкершілікке тартты. Заң бұзушылар ел аумағынан әкiмшiлiк жолмен шығарылып, енді 100 АЕК көлемінде айыппұл төлейді және оларға ҚР аумағына кіруге 5 жылға тыйым салынды.
Мамандардың айтуынша, секталар адамды психофизиологиялық жағынан аздырып, сыни тұрғыдан ойлау қабілетіне де әсер етеді.
